دا سفر په داسې حال کې ترسره کېږي چې څو ساعته مخکې د ایران د بهرنیو چارو وزیر، عباس عراقچي، د تهران د ډیپلوماتیکو هلو ځلو په دوام، له عمان څخه پاکستان ته روان شوی څو د مسعود پزشکیان له مل پلاوي سره یوځای شي. عراقچي د ایران د ولسمشر تر رسېدو مخکې، د پاکستان له لومړي وزیر شهباز شریف او د دغه هېواد له جګپوړو چارواکو سره کتلي او د دوه اړخیزو موضوعاتو او سیمهییزو بدلونونو په اړه یې خبرې اترې کړې دي. د ایران د بهرنیو چارو وزیر تر دې مخکې، د یوه ایراني پلاوي په ملتیا، چې د ایران د اسلامي شورا د مجلس رییس محمدباقر قالیباف هم پکې شامل و، د هرمز تنګي د مدیریت په اړه د سلا او همغږۍ لپاره له سویس څخه عمان ته سفر کړی و. ایراني سرچینو ویلي چې د ایران او امریکا ترمنځ د اړیکو د اسانتیا او منځګړیتوب په برخه کې د پاکستان د رول ستاینه د مسعود پزشکیان د اسلاماباد د سفر له مهمو محورونو څخه ده. د اقتصادي همکاریو پراخول او د دوه اړخیزو اړیکو پیاوړتیا هم د دې سفر په کاري اجنډا کې شامل دي. پاکستان په وروستیو میاشتو کې د تهران او واشنګټن ترمنځ د منځګړیتوب مهم رول لوبولی، او د دواړو هېوادونو ترمنځ هغه تفاهملیک چې د «اسلاماباد هوکړهلیک» په نوم یادېږي، د همدې هڅو له پایلو څخه ګڼل کېږي.
