په سویډن کې یو شمېر د بشري حقونو فعالانو د ښځو د همغږۍ د غورځنګ په ملاتړ او د یو شمېر افغانانو د ګډون سره اعتراضي غونډه ترسره کړه. د دې غونډې موخه د هغو ښځو د غږ رسونه بلل شوې وه چې په افغانستان کې د طالبانو د واکمنۍ تر لاندې د خپلو بنسټیزو بشري حقونو څخه بېبرخې شوې دي. ګډونوالو په افغانستان کې د ښځو او نجونو د وضعیت په اړه ژوره اندېښنه څرګنده کړه او د سویډن له حکومت، اروپایي ټولنې او نړیوالې ټولنې یې غوښتنه وکړه چې د بشري حقونو او د افغانستان د ښځو د حقونو په دفاع کې لا ډېر مسوولانه اقدام وکړي او د دغو پراخو سرغړونو پر وړاندې حساب ورکوونکي او ژمن پاتې شي.
