امريکا پرېکړه کړې چې نور به د روسيې او ايران د تېلو د اخيستو لپاره هېڅ اجازه يا معافيت ورنه کړي. دا خبره د امريکا د خزانې وزير سکاټ بېسنټ په سپينه ماڼۍ کې په يوه خبري غونډه کې کړې ده. هغه وويل چې پخوانۍ اجازه به نور نه غځېږي، او هغه تېل چې مخکې د اجازې له مخې اخيستل شوي وو، ټول لا مخکې لېږل شوي او کارول شوي دي. امريکا تېره مياشت هند ته د دېرشو ورځو لپاره اجازه ورکړې وه چې د بنديزونو سره سره د روسيې تېل واخلي، خو دا موده اوس پای ته رسېدلې ده. همدارنګه، امريکا د ايران د تېلو د لېږد پر ځينو کسانو، شرکتونو او بېړيو نوي بنديزونه لګولي دي.
