د امریکا ولسمشر، ډونالډ ټرمپ، ویلي چې د اسرائیل لومړی وزیر، بنیامین نتانیاهو، باید هره احتمالي هوکړه چې د واشنګټن او تهران ترمنځ رامنځته کېږي، ومني. د فاکس نیوز شبکې د دوشنبې په ورځ، د جون په ۸مه، راپور ورکړی چې دغه څرګندونې د ایران او اسرائیل ترمنځ د زیاتېدونکو کړکېچونو او پر اسرائیل د تهران د توغندیز برید له ترسره کېدو وروسته شوې دي. د راپور له مخې، ایران د اپرېل میاشتې له اوربند وروسته د لومړي ځل لپاره د اسرائیل پر لور توغندي توغولي دي؛ هغه اقدام چې د دواړو لورو ترمنځ د نښتو د بیا پیل احتمال په اړه اندېښنې زیاتې کړې دي. اسرائیلي چارواکو ویلي چې د دغو توغندیو یوه برخه رهګیري شوې او یو شمېر نور یې په پرانیستو سیمو کې لګېدلي دي. په ورته وخت کې، د اسرائیل پوځي چارواکو خبرداری ورکړی چې ایران د دې برید په ترسره کولو سره «لویه تېروتنه» کړې ده. دا څرګندونې په داسې حال کې کېږي چې یوه امریکايي چارواکي ویلي واشنګټن دا مهال پر ایران د اسرائیل د سمدستي برید تمه نه لري او باور لري چې له تهران سره د خبرو اترو د دوام او پرمخ بېولو لپاره لا هم فرصت شته.
