د رابعه نسیمي په نوم یوه افغان – بریتانوۍ مېرمن، د لوېدیځ لندن د ښار شورا په ټاکنو کې د برېتانيا د حزب کارگر د استازې په توګه بریالۍ شوې ده. هغه د «ایست اکتون» له حوزې نومانده وه او د ۱٬۲۰۷ رایو په ترلاسه کولو سره یې د شورا څوکۍ ګټلې. اغلې نسیمي په ۱۹۹۹ کال کې، د طالبانو د لومړۍ واکمنۍ پر مهال، له خپلې کورنۍ سره برېتانیا ته کډه شوې او په لندن کې مېشته ده. هغه د بشري حقونو او کډوالۍ د فعالې په توګه پېژندل کېږي او د کمبریج پوهنتون څخه د دوکتورا سند لري.
