د پاکستان د پخواني لومړي وزیر عمران خان زرګونه پلویان د دغه هېواد پلازمېنې اسلاماباد پر لور لاریون کوي او د هغه د خوشې کېدو غوښتنه کوي.
دغه لاریون د تحریک انصاف ګوند، د عمران خان د کورنۍ غړو او د هغه د پلویانو له لوري جوړ شوی دی. خو لاریون له خنډونو سره مخ دی او اسلاماباد ته تلونکې یو شمېر لارې هم تړل شوې دي.
لاریون د یکشنبې په ورځ د اسلاماباد په ۲۷۵ کیلومترۍ کې د لکي مروت له ښار څخه پیل شو. لاریون کوونکو تېره شپه په لاره کې تم شوه او ټاکل شوې چې د دوشنبې په ورځ شاوخوا غرمه د ځايي وخت له مخې خپل سفر بیا پیل کړي.
دا لاریون په اصل کې د تېرې اوونۍ لپاره پلان شوی و، خو د حکومت او تحریک انصاف ترمنځ د خبرو لپاره وځنډول شو. د دواړو لورو ترمنځ خبرې وروسته له هغه بې پایلې شوې چې په مهمو موضوعاتو کې هوکړې ته ونه رسېدل.
