د کورنیو چارو وزارت ویلي، د جنايي تخنیکونو ریاست د بیولوژۍ او DNA په لابراتوار کې د چټک DNA پېژندنې سیسټم په فعالیت پیل کړی، چې د عدلي او جنايي څېړنو د عصري کېدو پر لور مهم ګام بلل کېږي. وزارت د چهارشنبې په ورځ په خپره کړې خبرپاڼه کې ویلي، دغه سیسټم به د جنايي څېړنو تخنیکي وړتیاوې لوړې کړي، د قضیو د څېړنې چټکتیا او دقت به زیات کړي، او د پرمختللو عدلي او فورنزیکي ازموینو له لارې به د هېواد د عدلي نظام په پیاوړتیا کې مهم رول ولوبوي.
