د مراکش او امریکا پوځونو اعلان کړی چې د یوې امریکایي ښځینه عسکرې جسد، چې په مراکش کې د پوځي تمرینونو پر مهال ورکه شوې وه، موندل شوی دی. د مراکش وسلهوالو ځواکونو وویل چې د «کاب درعه» په سیمه کې د دویمې ورکې شوې امریکایي عسکرې جسد موندل شوی دی. د امریکا پوځ ویلي چې دغه ښځینه عسکره ماریا سیمون کولینګټون نومېده او ۱۹ کاله عمر یې درلود. د مراکش د پوځ د معلوماتو له مخې، دغه امریکایي عسکره د مې میاشتې له دویمې نېټې راهیسې د پوځي تمرینونو پر مهال ورکه شوې وه. په خپره شوې خبرپاڼه کې ویل شوي چې د مراکش او امریکا ځواکونو په ګډې همکارۍ د لټون عملیات ترسره کړل. د چارواکو په وینا، د دې عسکرې جسد «کاب درعه» ته نږدې په یوه ډبرینه سیمه کې موندل شوی او وروسته انتقال شوی دی. څو ورځې مخکې د یوه بل امریکایي عسکر جسد هم موندل شوی و، چې له دې عسکرې سره یوځای ورک شوی و. رسنیو راپور ورکړی چې دغه دواړه عسکر د مراکش ساحلونو ته نږدې د پوځي تمرینونو پر مهال نادرکه شوي وو. امریکایي او مراکشي چارواکو تر اوسه د دې پېښې د اصلي لامل په اړه نور جزییات نه دي خپاره کړي. په مراکش کې د دویم امریکایي عسکر د جسد موندل کېدو سره، څو ورځني د لټون عملیات پای ته ورسېدل، خو د پېښې د څرنګوالي په اړه څېړنې لا هم روانې دي.
