د طالبانو د بهرنیو چارو سرپرست وزیر امیرخان متقي به سبا سېشنبې په پیکینګ کې د چین او پاکستان له باندنیو چارو وزیرانو سره په درې اړخیزه غونډه کې ګډون وکړي.
د پاکستان د بهرنیو چارو وزیر او د صدراعظم مرستیال اسحاق ډار نن دوشنبې چین ته روانېږي او ټاکل شوې،چې متقي هم نن له تهرانه پیکینګ ته لاړ شي.
د پاکستاني رسنیو راپور ورکړی،چې له اسحاق ډار سره به یو پلاوی هم ملګری وي. نوموړی او ورسره مل پلاوی به یې د چین له صدراعظم او ځینو نورو چارواکو سره وویني.
ټاکل شوې،چې د افغانستان، چین او پاکستان د باندنیو چارو وزیران په درې اړخیزه غونډه کې پر خپل منځي سوداګرۍ، سیمه ییز امنیت او همکارۍ خبرې وکړي.
دا غونډه وروسته له دې کېږي،چې د هند او پاکستان ترمنځ د کشمیر په پهلګام کې په تروریستي برید پسې شخړې رامنځ ته شوې.
هند د پاکستان او چین ګډ سیال ګڼل کېږي.
