د روغتیا نړیوال سازمان په افغانستان کې د شري د ناروغۍ د زیاتېدو خبر ورکړی دی. ياد سازمان ويلي په تېره یوه میاشت کې په دې هېواد کې د شري ناروغۍ پېښې څه باندې ۴۲ سلنه ډېرې شوي دي.
ډبیلو ایچ او په خپل تازه راپور کې چې د اپریل په ۲۵ یې خپور کړی ویلي د یوې میاشتې په موده کې په افغانستان کې له ۱۲۵۳۵ ماشومان په شري اخته شوي چې دا بې ساری زیاتوالی دی.
د دې راپور له مخې یوازې د مارچ په میاشت کې د دغه ناروغۍ له امله ۸۲ تنه مړه شوي،چې ډیری یې ماشومان دي.
د راپور په ټکو په دې سره په روان میلادي کال کې د شري د ناروغۍ له امله د مړو شویو ټولیز شمېر ۱۹۳ تنو ته رسېدلی دی.
په همدې حال کې د افغانستان په بېلابېلو ولایتونو کې یو شمېر کورنۍ وايي چې په وروستیو کې د دوی په سیمو کې د شري ناروغي زیاتې شوې او خلک یې سخت اندېښمن کړي دي.
شری یوه ساري ناروغي ده چې د پرنجي، ساه اخیستلو او ناروغ انسان سره د اړیکې له لارې روغ انسان ته انتقالېږي.
ماشومان، اميدوارې مېرمنې او هغه کسان چې د معافیت سیستم یې کمزوری وي د دې ناروغۍ له لوړ خطر سره مخ کېږي.
متخصص ډاکتران د دې ناروغۍ پرمهال تر ډېره د دردونو د مخنیوي لپاره پاراستامول یا د درد ضد درمل تجویزوي.
دوی دغه راز د دې ناروغۍ د مخنیوي لپاره د واکسین ترلاسه کول مهم بولي او وايي چې ناروغ ماشومان باید له روغو لیرې وساتل شي.
د روغتیا نړیوال سازمان هم بيان کې د شري د ناروغۍ د خپرېدو د مخنیوي لپاره پر واکسین ټينګار کړی.
دغه سازمان د هوا سړېدل او دغه راز افغانستان ته د کډوالو بېرته ستنېدل د دې ناروغۍ د زیاتېدو مهم لاملونه بللي دي.
یو شمېر روغتیا پوهان هم وايي چې د کډوالو بې سارې ستنېدل د شري او نورو ساري ناروغیو د خپرېدو ویره ډېره کړې ده.
په افغانستان د طالبانو د حکومت د عامې روغتیا وزارت ویاند شرافت زمان د رسنيو پوښتنې نه دي ځواب کړې خو دغه وزارت تېر کال په نومبر میاشت کې ویلي وو،چې په ماشومانو د شري د ناروغۍ مثبتې پېښې زیاتې شوي دي.
د روغتیا نړیوال سازمان تېر کال په یو راپور کې ویلي وو چې په ۲۰۲۴ کال کې په افغانستان کې ۵۲ زره کسان په دې ناروغۍ اخته شوي وو.
