ریچارډ لینډسي، د افغانستان لپاره د بریتانیا ځانګړي استازي، د هرات ولایت د جبرئیل سیمې د اعتراضي غونډې د مهار کېدو په غبرګون کې د کړکېچ د کمېدو، د بیان ازادۍ ته د درناوي او د هر ډول ناقانونه زیان په اړه د حسابورکولو غوښتنه کړې ده. لینډسي د سېشنبې په ماښام په ایکس پاڼه کې لیکلي: «په هرات کې د زور کارونې د راپورونو له امله ژوره اندېښنه لرم. د کړکېچ د کمېدو، د بیان ازادۍ ته د درناوي او د هر ډول ناقانونه زیان په اړه د حسابورکولو غوښتنه کوم.» دا څرګندونې داسې مهال شوې چې د سېشنبې په ورځ د طالبانو امنیتي ځواکونو د هرات ولایت د جبرئیل په سیمه کې یوه اعتراضي غونډه خپره کړه. د هرات د امنیې قوماندانۍ ویاند سید مسعود حسیني ویلي، دغه غونډه د تاوتریخوالي او عامه نظم د ګډوډۍ لامل شوې وه. حسیني ویلي چې یو شمېر کسان د حجاب موضوع په تړاو د اعتراض په پلمه راټول شوي وو او د عامه نظم د ګډوډولو هڅه یې کوله، خو د امنیتي ځواکونو په وخت مداخلې د کړکېچ د پراخېدو مخه ونیوله او وضعیت په بشپړ ډول تر کنټرول لاندې راوستل شو. په همدې حال کې، ځینو سیمهییزو سرچینو او عیني شاهدانو راپور ورکړی چې طالبانو له معترضانو سره چلند کړی او یو شمېر کسان یې نیولي دي. دا ادعاوې تر اوسه د طالبانو چارواکو په رسمي ډول نه دي تایید کړې او نه یې رد کړې دي.
