د هند حکومت پرېکړه کړې، چې د عمومي ټاکنو څخه مخکې د امنیتي اندېښنو او د زیات شوي کړکیچونو په منځ کې د خپلو ډیپلوماټانو کورنۍ او خپلوان له بنګله دېشه وباسي. رویټرز راپور ورکړی، چې دغه پرېکړه د احتیاطي اقدام په توګه او د احتمالي امنیتي ګواښونو په ځواب کې اخیستل کیږي. د بنګله دېش عمومي ټاکنې د فبروري په ۱۲مه ترسره کیږي، چې کمپاینونه یې په رسمي ډول نن پیلېږي. ټاکنې د اپوزیسیون او حکومتي ملاتړو دواړو لخوا د پراخو لاریونونو له امله زیانمنې شوې، چې د دغه هېواد سیاسي فضا یې کړکېچنه کړې ده. راپورونه ښیي، چې د ټاکنو د پروسې له پیل سره سم د سړکونو د تاوتریخوالي او امنیتي بې ثباتۍ په اړه اندېښنې زیاتې شوې دي. په وروستیو میاشتو کې د نوي ډیلي او ډهاکې ترمنځ اړیکې هم خړې پړې شوې دي. دا کړکیچونه وروسته له هغه زیات شول، چې د بنګله دېش پخوانۍ لومړۍ وزیرې شېخ حسینه په ۲۰۲۴ کال کې د مرګوني لاریونونو وروسته هند ته وتښتېده. دې پېښې په بنګله دېش کې سخت غبرګونونه راوپارول او د دواړو ګاونډیو هېوادونو ترمنځ په اړیکو کې سړه هوا رامنځته کړه. د رویټرز په وینا، د ډیپلوماټانو د کورنیو وتل د بنګله دېش د راتلونکو ټاکنو څخه مخکې د سیاسي او امنیتي پرمختګونو په اړه د هند د جدي اندېښنې نښه ګڼل کیږي، که څه هم په هېواد کې به د هند ډیپلوماتیک ماموریتونه خپل فعالیت ته دوام ورکړي.
