د اوکراین د کییف اړوندې سیمې کې د روسیې د بالستیک توغندي په برید کې لږ تر لږه ۱۰ کسان وژل شوي او شاوخوا ۱۰۰ نور ټپیان شوي دي. د اوکراین چارواکي وايي، دغه برید د دفاعي صنعت د یوې غونډې پر مهال شوی دی. د اوکراین ولسمشر ولودېمېر زېلېنسکي ویلي، د جګړې په شرایطو کې باید د داسې برید مخه نیول شوې وای. د اوکراین د بیړنیو خدمتونو ادارې ویلي، د ژغورنې عملیات پای ته رسېدلي او د ژغورنې ډلې د ویجاړو شویو ودانیو له کنډوالو څخه د قربانیانو د ایستلو چارې بشپړې کړې دي. خپرو شویو انځورونو کې د ژغورنې کارکوونکي لیدل کېږي چې د هستوګنیزو سیمو ترڅنګ د ویجاړو شویو ودانیو په کنډوالو کې د لټون عملیات ترسره کوي. زېلېنسکي په خپله ماښامنۍ وینا کې روسیه د دغه برید مسؤله بللې او ویلي یې دي چې د دې پېښې اصلي لامل «روسي توغندي او روسي ترهګري» ده.
