د طالبانو د کانونو او پټرولیم وزارت په هرات کې د نفتو او طبیعي ګازو د موندنې او استخراج لپاره له یوه سعودي شرکت سره نوی تړون لاسلیک کړی دی.
دغه تړون د سعودي عربستان له «دلتا انټرنشنل» شرکت سره شوی او موخه یې د هرات د کشک ـ تېرپل په حوزه کې د نفتو او ګازو د احتمالي زېرمو پلټنه او وروسته، د کافي زېرمو د تثبیت په صورت کې، د استخراج چارې پیلول دي.
د طالبانو د کانونو او پټرولیم وزیر هدایتالله بدري د تړون د لاسلیک پر مهال وویل چې یاده حوزه پراخه سیمه رانغاړي او په بېلابېلو بلاکونو وېشل شوې ده. د هغه په وینا، د دې حوزې په ډېرو برخو کې د طبیعي ګازو د موجودیت احتمال تر نفتو زیات بلل کېږي.
د کانونو او پټرولیم وزارت تمه لري چې د اکتشافي فعالیتونو له بشپړېدو او د سوداګریزو زېرمو له تثبیت وروسته به په سیمه کې د استخراج عملي بهیر هم پیل شي.
طالب چارواکي هیله لري چې که د هرات د ګازو زېرمې په کافي اندازه وموندل شي، په راتلونکې کې به له دغو سرچینو څخه د افغانستان د کورنیو اړتیاوو د پوره کولو لپاره استفاده وشي. افغانستان اوس هم د خپلې انرژۍ د اړتیاوو یوه برخه له بهرنیو سرچینو پوره کوي، نو د کورنیو زېرمو پراختیا د وارداتو د کمولو لپاره مهمه بلل کېږي.
د پروژې په لومړنیو پړاوونو کې به د سیمې جیولوژیکي جوړښت وڅېړل شي، تخنیکي سروې به ترسره شي او د اکتشافي برمهکارۍ له لارې به معلومه شي چې په سیمه کې څومره نفت او ګاز موجود دي او استخراج یې له اقتصادي اړخه څومره ګټور تمامېدای شي.
د تړون د لاسلیک په غونډه کې زلمي خلیلزاد، چې پخوا د افغانستان لپاره د امریکا ځانګړی استازی و، هم ګډون کړی و.
خلیلزاد په خپلو خبرو کې د افغانستان طبیعي سرچینو ته اشاره وکړه او ویې ویل چې دغه هېواد د کانونو، نفتو، ګازو او نورو طبیعي شتمنیو په برخه کې د پام وړ ظرفیت لري. د هغه په باور، که له دغو سرچینو څخه په سمه او مسلکي توګه استفاده وشي، د افغانستان په اقتصادي پرمختګ کې مهم رول لوبولی شي.
د هرات د نفتو او ګازو پروژه یوازې د انرژۍ له پلوه نه، بلکې د اقتصادي فعالیتونو لپاره هم مهمه ګڼل کېږي. که اکتشافي چارې مثبتې پایلې ولري او استخراج عملي بڼه خپله کړي، پروژه د مستقیمو او غیرمستقیمو کاري فرصتونو د رامنځته کېدو ترڅنګ د اړوندو زیربناوو او خدماتو د پراختیا زمینه هم برابرولای شي.
خو د دې پروژې حقیقي اقتصادي ارزښت به تر ډېره د راتلونکو اکتشافي څېړنو پر پایلو پورې تړلی وي. تر هغو چې د نفتو او ګازو اندازه، کیفیت او د استخراج لګښتونه په تخنیکي توګه نه وي تثبیت شوي، د تولید د کچې او احتمالي عوایدو په اړه کره اټکل ستونزمن دی.
په ټوله کې، د هرات د کشک ـ تېرپل حوزې تړون په افغانستان کې د نفتو او ګازو د کورنیو سرچینو د پراختیا یوه نوې هڅه ده. که پروژه د پلان له مخې عملي او د پام وړ زېرمې وموندل شي، ښايي په راتلونکو کلونو کې د افغانستان د انرژۍ د کورني تولید په زیاتولو کې ونډه واخلي.
