د روسیې د امنیت شورا سکرتر سرګی شویګو ویلي چې د افغانستان اسلامي امارت ادارې د نشهيي موادو پر ضد د مبارزې په برخه کې خپلو ژمنو ته عمل کړی او د قاچاق د کمولو لپاره یې پراخ اقدامات ترسره کړي دي. تاس خبري اژانس د شویګو له قوله راپور ورکړی چې د افغانستان اسلامي امارت ادارې د نشهيي موادو د صنعتي تولید او صادراتو لویه برخه درولې ده. هغه زیاته کړې چې له افغانستان څخه د نشهيي موادو تولید او لېږد د پخوا په پرتله نږدې ۹۰ سلنه کم شوی، او دا پرمختګ د قاچاق پر ضد د عملي اقداماتو پایله ده.
