ایراني رسنیو راپور ورکړی چې په ټول ایران کې ټولې کورنۍ او نړیوالې الوتنې تر بلې خبرتیا پورې لغوه شوې دي. مسوولو چارواکو له مسافرو غوښتي چې هوايي ډګرونو ته له تګ څخه ډډه وکړي او د وروستیو معلوماتو لپاره رسمي خبرتیاوې تعقیب کړي. د راپورونو له مخې، د هوايي چلند د نوې خبرتیا (NOTAM) له خپرېدو او د الوتنیزو محدودیتونو له پراخېدو وروسته، د الوتنو ځنډول چې مخکې یوازې د ایران د لوېدیځې هوايي فضا ځینې برخې رانغاړلې وې، اوس د هېواد ټولو هوايي ډګرونو ته غځېدلي دي. په ورته وخت کې، د ایسنا خبري اژانس د ایران د حج او زیارت سازمان له قوله راپور ورکړی چې د روانو شرایطو له امله د حاجیانو د بېرته ستنېدو الوتنې ښايي تر ۷۲ ساعتونو پورې له ځنډ سره مخ شي.
