اېټامار بنګوېر، د اسرائیل د سخت دریځه ښياړخي حکومت د ملي امنیت وزیر، د ایران له لوري شمالي اسرائیل ته د نویو توغندیزو بریدونو وروسته د سخت غبرګون غوښتنه کړې ده. هغه د یکشنبې په ورځ په یوه لنډ پیغام کې چې په عبري ژبه په ټولنیزه شبکه ایکس خپور شوی و، لیکلي: «نن شپه تهران دې وسوځي!» دا څرګندونې وروسته له هغې شوې چې ایران څو ساعته د اسرائیل له لوري د بیروت د جنوبي څنډې تر برید وروسته پر اسرائیل د توغندیو نوې څپه توغولې ده. د اسرائیل پوځ ویلي چې دغه توغندي شنډ شوي او تر اوسه د مرګ ژوبلې رسمي راپور نه دی ورکړل شوی. په همدې حال کې، دا دریځ د ډونالډ ټرمپ له هڅو سره په ټکر کې بلل کېږي. هغه مخکې له اسرائیل غوښتي و چې له پراخو غچ اخیستونکو بریدونو ډډه وکړي او د خبرو اترو او اوربند د دوام ملاتړ یې کړی و.
