ایالات متحده ویلي چې پر بندرعباس وروستي بریدونه د «ځان دفاع» په چوکاټ کې او د ایراني ځواکونو له احتمالي ګواښونو څخه د امریکايي ځواکونو د ساتنې په موخه ترسره شوي دي. امریکايي چارواکو ویلي چې په دې عملیاتو کې د راکټونو د توغولو ځینې مرکزونه او یو شمېر ایراني کښتۍ په نښه شوې دي. واشنګټن ټینګار کړی چې له ایران څخه د بریدونو سربېره یې «له زغم» کار اخیستی او په دغو پېښو کې امریکايي ځواکونو ته زیان نه دی اوښتی. رسنیو راپور ورکړی چې دغه نښتې د اوربند له پیل وروسته هم څو ځله تکرار شوې دي. ډونالډ ټرمپ تر دې مخکې ویلي وو چې دا ډول پېښې د اوربند نقض نه ګڼي. سره له دې چې کړکېچ زیات شوی، ځینې شنونکي باور لري چې دا پرمختګونه ښايي د سولې د خبرو بهیر په بشپړه توګه ونه دروي، خو د خبرو اترو پر فضا اغېز لرلای شي. همدارنګه راپورونه وایي چې ټرمپ شاوخوا یوه اوونۍ وړاندې د پراخ برید نیت درلود، خو د خلیجي هېوادونو په منځګړیتوب دغه اقدام ځنډول شوی دی.
