د راپورونو له مخې، د ایران حکومت له عمان سره په مشورو بوخت دی څو د هرمز تنګي د سمندري تګ راتګ د تنظیم لپاره یو دایمي میکانیزم رامنځته کړي چې پکې د عوارضو وضعه هم شامله وي. د ایران سفیر په فرانسه کې محمد امیننژاد ویلي چې ایران او عمان باید خپلې سرچینې د امنیت او کښتۍ چلولو د مدیریت لپاره منسجمې کړي. هغه زیاته کړې چې دا به لګښتونه ولري او د دغه مسیر له کاروونکو به د ونډې اخیستنه وشي، او ټینګار یې کړی چې دغه سیستم به شفاف وي. بل لوري ته، د امریکا ولسمشر ډونالډ ټرمپ دغه طرحه رد کړې او ویلي یې دي چې د هرمز تنګه باید «ازاد او پرانیستی» پاتې شي او هېڅ ډول عوارض ورته د منلو وړ نه دي. د امریکا د بهرنیو چارو وزیر مارکو روبیو هم ویلي چې د سمندري تګ راتګ پر سر عوارض وضع کول به د واشنګټن او تهران ترمنځ د هر ډول توافق خنډ شي. د عمان حکومت تر اوسه په دې اړه رسمي غبرګون نه دی ورکړی.
