د مانيل سلګونه اوسېدونکي بې کوره شوي

د فیلپین د پلازمېنې مانیل په ګڼ مېشته توندو سیمه کې یوې لویې اورلګېدنې لسګونه کورونه په بشپړ ډول ویجاړ کړي او سلګونه اوسېدونکي یې بې کوره کړي دي. د سیمه‌ییزو سرچینو پر وینا، دا پېښه پرون سهار رامنځته شوې او لوی اورونه په چټکۍ سره د استوګنې کورونو ته خپاره شوي. د مانیلا د ناورین مدیریت دفتر داسې انځورونه خپاره کړي، چې د لوګیو ستنې او د سیمې له ودانیو څخه اسمان ته د لویو اورونو پورته کیدل ښیي. که څه هم د انساني تلفاتو رسمي راپور نه دی ورکړل شوی، خو د ښار چارواکو د اوسېدونکو د بیړني اېستلو او سیمې ته د لویو اور وژنې او ژغورنې ټیمونو لیږلو اعلان کړی دی. د عیني شاهدانو پر وینا، د کورونو لوړ کثافت او د دوی په جوړولو کې کارول شوي سپک وزن لرونکي توکي د اور سرعت څو چنده کړی دی. د ټونډو سیمه د مانیل یو له ډېرو ګڼ مېشته او بېوزلو برخو څخه ده او په تېرو وختونو کې د ورته پېښو صحنه وه. د خوندیتوب زیربنا نشتوالی او د نفوس کثافت تل په سیمه کې د لویې کچې اور لګېدو ګواښ لوړ ساتلی دی. د فیلپین چارواکو ژمنه کړې،چې د پېښې د لامل په اړه به بشپړه څېړنه پیل کړي او د اور په بشپړ ډول کنټرول کېدو وروسته به له قربانیانو سره مرسته وکړي.