سمنګان کې د طالبانو سیمهییز مسئولینو ویلي،چې د دغه ولایت د یوه قومي مشر د وژلو په پېښه کې د لاس لرلو په تور درې تنه نیول شوي دي.
د سمنګان د طالبانو امنیې قوماندانۍ ویاند حشمتالله رحماني ویلي،چې دغه قومي مشر د تېرې اوونۍ د پنجشنبې په ورځ مازدیګر مهال یوې ټلیفوني اړیکي ته له ځواب ورکولو وروسته په یوه کرولا موټر کې له خپل کوره وتلی او بیا لادرکه شوی و.
د رحماني په خبره، د پولیسو په هڅو د یاد کس مړی موندل شوی او څېړنې ښيي چې وژل شوی دی.
هغه ویلي چې د دغه قومي مشر د وژلو په تور د طالبانو امنیتي ځواکونو لخوا درې کسان نیول شوي او په دې اړه څېړنې روانې دي.
د یادونې ده،چې وژل شوی کس حاجي محمداکبر نیازی نومېده او د سمنګان قومي مشر و،چې دوه کاله مخکې د ایبک د یوې ناحیې د ګذر د وکیل په توګه ټاکل شوی و.
