واشنګټن پوسټ په یوه نوي راپور کې لیکلي،چې د کانونو د استخراج او پانګونې په برخه کې د امریکا او اوکراین تر منځ وروستی تړون له جدي ننګونو سره مخ دی او ښايي په لنډ مهال کې به د پام وړ پایلې ونه رسوي.
دغې ورځپاڼې د شنبې په ورځ د مې په ۳مه راپور ورکړی،چې په اوکراین کې د ټایټانیوم، ګرافیت او لیتیم په څېر سرچینو استخراج له خنډونو سره مخ دی لکه د زیربناوو نشتوالی، ناامني او د پانګوالو شکونه.
واشنګټن پوسټ د بین کاهیل په حواله راپور ورکړی،چې د څو عواملو له امله لوی امریکايي شرکتونه د اوکراین د تېلو او ګازو په سکتور کې د پانګونې لپاره لږ لیوالتیا لري.
دغه راز د امریکا د انرژۍ د وزارت یوه پخواني چارواکي اشلي زوموالټ فوربس له دې ورځپاڼې سره په خبرو کې ویلي،چې په اوکراین کې د معدني زېرمو د پراختیا لپاره د پانګې جذبول د امریکا او کاناډا په څېر هېوادونو په پرتله ډېر ستونزمن کار دی.
د دغه تړون د احکامو له مخې چې د مې په لومړۍ نېټه اعلان شو، د کانونو د استخراج له مالیې او د نویو جوازونو د صادرولو عواید به د امریکا او اوکراین د ګډې پانګونې صندوق ته وسپارل شي.
دا فنډ به د لومړیو لسو کلونو لپاره ګټه ونه وېشي او ټول عواید به یې په اوکراین کې بیا ولګول شي.
د دواړو خواوو له مالي ژمنو سره سره، په دې تړون کې د اوکراین په خاوره کې د سرچینو یا پروژو د ساتنې لپاره د واشنګټن هېڅ امنیتي ژمنه شامله نه ده.
