شهباز شریف، د پاکستان لومړي وزیر، ویلي چې د ایران او امریکا ترمنځ د احتمالي هوکړې لپاره د خبرو اترو بهیر په «سم لوري» روان دی. د اناتولي خبري اژانس د دوشنبې په ورځ، د مې په ۲۵مه، راپور ورکړی چې اسلاماباد په وروستیو ورځو کې د تهران او واشنګټن ترمنځ د کړکېچ د کمولو لپاره خپلې ډیپلوماتیکې هڅې زیاتې کړې دي. شهباز شریف ویلي چې پاکستان د دواړو هېوادونو ترمنځ د منځګړیتوب لپاره په «صادقانه نیت» اقدام کړی او هیله لري چې دا هڅې د سولې او متقابل تفاهم د بیا ټینګېدو لامل شي. په همدې حال کې، سید عاصم منیر او سید محسن نقوي د تېرې اوونۍ په وروستیو کې تهران ته سفر کړی او هلته یې له ایراني چارواکو سره لیدنې کړې دي. له دې ډیپلوماتیکو هڅو سره سره، لا هم روښانه نه ده چې تهران او واشنګټن به په راتلونکو ورځو کې وروستۍ هوکړې ته ورسېږي که نه. د ایران د اټومي پروګرام، بندیزونو او سیمهییزو مسایلو په اړه اختلافونه لا هم د دواړو هېوادونو په اړیکو کې له مهمو ننګونو څخه ګڼل کېږي.
