د امریکا ولسمشر ډونالډ ټرمپ په خپله وروستۍ وینا کې، په منځني ختیځ کې د خپلو متحدینو، په ګډون د اسراییلو او عربي هېوادونو لپاره په خپل قوي ملاتړ ټینګار وکړ. ټرمپ وویل: “زه غواړم په منځني ختیځ کې زموږ له متحدینو څخه مننه وکړم: اسراییل، سعودي عربستان، قطر، متحده عربي امارات، کویت او بحرین.” د هغه په وینا، “دوی غیر معمولي وو او موږ به اجازه ورنکړو چې دوی ته په هېڅ ډول، شکل یا بڼه زیان ورسیږي یا ماتې ورکړل شي.” د ټرمپ څرګندونې په داسې حال کې راغلې، چې د ایران په وړاندې د امریکا او اسراییلو جګړه دوام لري او د فارس خلیج عربي هېوادونه هم د ایراني بریدونو سره مخ شوي دي. نن (پنجشنبه، د اپرېل ۲مه) د ایران په وړاندې د امریکا او اسراییلو د جګړې ۳۴مه ورځ ده، او په دې موده کې د امریکا او اسراییلو د بریدونو په پایله کې په منځني ختیځ کې له څه باندې درې زره خلک وژل شوي دي. په دې وینا کې، ټرمپ یو ځل بیا د بریا ادعا وکړه او ویې ویل چې امریکا د دې عملیاتو لپاره ټاکل شوي ډېری اهداف ترلاسه کړي دي.
