د ایران بهرنیو چارو وزیر، سید عباس عراقچي په خپلو تازه څرګندونو کې ویلي، چې هېواد یې د جګړې د مدیریت او پای ته رسولو بشپړ واک او وړتیا لري. عراقچي ټینګار کړی، چې د جګړې د پای وخت او بڼه دوی پخپله ټاکي، هغه ویلي چې ایران تېرې دوه لسیزې د خپلو پولو په ختیځ او لوېدیځ کې د امریکا د پوځ ماتې په دقت څېړلې او لازم درسونه یې ترې اخیستي دي. د ایران د بهرنیو چارو وزیر زیاته کړې، چې د دوی پر پلازمېنې (تهران) بمبارول د جګړې د دوام په برخه کې د دوی پر وړتیا هېڅ اغېز نه لري. هغه د ایران “غیر متمرکز او څو لایه دفاعي سیسټم” ته په اشارې سره ویلي، چې دغه وړتیا دوی ته اجازه ورکوي، چې د جګړې مدیریت په خپل لاس کې ولري.
