جمعیت اسلامي افغانستان په یوه خبرپاڼه کې د هزارهګانو او شیعهګانو پر وړاندې د طالبانو وروستي اقدامات غندلي دي.
په خبرپاڼه کې ویل شوي چې طالبان د افغانستان د بېلابېلو قومي او مذهبي ډلو پر وړاندې د «توپیري چلند» په دوام کې، په دې وروستیو کې د شیعهګانو اړوند یو شمېر رسنیز او ښوونیز بنسټونه تر فشار لاندې راوستي دي.
د جمعیت اسلامي په وینا، د خاتمالنبیین مرکز او تمدن ټلوېزیون فعالیتونه هم درول شوي دي.
دغه ډله وايي، د طالبانو دا اقدام د هغو بنسټونو پر وړاندې ښکاره دښمني ښيي چې د خلکو د پوهاوي، اسلامي ارزښتونو د پیاوړتیا، د بېلابېلو اسلامي مذهبونو ترمنځ د نږدېوالي او د افغانانو د یووالي لپاره کار کوي.
جمعیت اسلامي افغانستان د طالبانو دغه اقدام «ناوړه او توپیري» بللی او ویلي یې دي چې دا ډول چلند به د افغانانو له جدي غبرګون سره مخ شي.
په خبرپاڼه کې ټینګار شوی چې هزارهګان او شیعهګان د افغانستان د ټولنې مهمه برخه ده او باید د نورو افغانانو په څېر په ټولنیزو، سیاسي، اقتصادي، کلتوري، ښوونیزو او رسنیزو برخو کې د فعالیت بشپړ حق ولري.
جمعیت اسلامي همداراز له ټولو افغانانو سره د برابر چلند او د هغوی د حقونو د خوندي کولو غوښتنه کړې ده.
