د هرات ولایت د مطبوعاتو دفتر وایي، د افغانستان د کانونو د ډبرو لومړنۍ جوپه، چې ارزښت یې ۱۰۰ زره امریکایي ډالره دی، متحده ایالاتو ته صادره شوې ده. د خپرې شوې خبرپاڼې له مخې، په دې جوپه کې د هرات ولایت د زندهجان ولسوالۍ د کان تورې ډبرې شاملې دي، چې د یوه خصوصي شرکت له خوا، د هرات د سوداګرۍ او پانګونې خونې په همغږۍ، د امریکا بازار ته صادرې شوې دي. د هرات ولایت د مطبوعاتو دفتر ویلي، د دغې جوپې صادرېدل د افغانستان د کانونو د محصولاتو د صادراتو د پراختیا او په نړیوالو بازارونو کې د هېواد د تولیداتو د حضور د پیاوړتیا په برخه کې یو مهم ګام ګڼل کېږي.
