داودزي: د افغانستان د راتلونکي جوړولو لپاره نور پر پردیو تکیه ونه کړو
د افغانستان د سولې په چارو کې د دولت پخواني وزیر محمد عمر داودزي ویلي، افغانان باید د تېرو شلو کلونو له بریاوو او تېروتنو زده کړه وکړي او د خپل هېواد د راتلونکي د جوړولو لپاره پر خپل ملي توان باور وکړي.
داودزي په یوه تازه لیکنه کې ویلي، د جمهوري نظام په شلو کلونو کې ګڼ مثبت کارونه شوي، خو تېروتنې هم شوې دي او اړینه ده چې دغه تېروتنې په رښتینولۍ وارزول شي او له هغو څخه زده کړه وشي.
هغه ویلي، یوه مهمه تېروتنه دا وه چې افغانستان ته د امریکا حضور یې د شوروي اتحاد د یرغل او د انګرېزانو له پخوانیو یرغلونو سره بنسټیز توپیر لرونکی باله او فکر یې کاوه چې د امریکا حضور به په افغانستان کې اوږدمهاله وي.
د داودزي په وینا، په ۲۰۱۶ کال کې د ویتنام د جګړې په پای کې د امریکايي ځواکونو د وتلو د یوه مشهور انځور له لیدلو وروسته د هغه په سیاسي لید کې بدلون راغی. هغه ویلي، له دې وروسته دې پایلې ته ورسېد چې لوی قدرتونه هم له هېوادونو وځي او د ملي ګټو له بدلېدو سره د هغوی ژمنې او حضور هم بدلېدای شي.
داودزي ویلي، کله چې په ۲۰۱۸ کال کې پخواني ولسمشر اشرف غني ترې وغوښتل چې بېرته په دولت کې کار وکړي، ده یوازې د سولې په برخه کې د کار کولو شرط کېښود او دغه شرط ومنل شو.
هغه ټینګار کړی چې افغانستان باید نور د خپل راتلونکي د جوړولو لپاره پر بهرنیو هېوادونو تکیه ونه کړي.
د داودزي په وینا، د افغانستان د پرمختګ او ثبات لاره په علم، ملي تفاهم، عدالت، سم مدیریت او پر خپل ملي توان په باور کې ده، نه د پردیو په ملاتړ او مرستو کې.
نوموړي ویلي، افغانان کولای شي له سیاسي اختلافونو سره سره د ګډ ژوند هنر زده کړي او د دې بهیر مهمه برخه زغم دی.
