د طالبانو د امر بالمعروف او نهی عن المنکر وزیر، محمد خالد حنفي، په یوه غږیز پیغام کې ادعا کړې چې د طالبانو له بیا واکمنېدو مخکې په افغانستان کې د عیسویت د تبلیغ سلګونه مرکزونه فعال وو. هغه ویلي، د طالبانو له واکمنېدو وروسته دغه مرکزونه له منځه وړل شوي او فعالیتونه یې پای ته رسېدلي دي. خو محمد خالد حنفي نه دي ویلي چې دغه ادعا شوې مرکزونه د افغانستان په کومو سیمو کې وو او د خپلو څرګندونو د ملاتړ لپاره یې کوم شواهد یا اسناد هم نه دي وړاندې کړي.
