د بریتانیا د حکومت د نوي پلان له مخې، هغه کسان چې په دغه هېواد کې د پناه غوښتنې حق ترلاسه کوي او وروسته کار پیل کړي او عاید ولري، باید د استوګنې او د ترلاسه شوو ملاتړونو شاوخوا ۱۰ زره پونډه لګښت بېرته حکومت ته ادا کړي. دا تدابیر د «مهاجرت او پناه غوښتنې لایحې» برخه ده او موخه یې دا ده چې له هغو بالغانو څخه چې مالي توان لري، د دولتي خدماتو لګښتونه بېرته ترلاسه شي. د راپورونو له مخې، هغه پناه غوښتونکي چې د کار اجازه لري، باید دا ټاکل شوې اندازه پیسې تر دې مخکې ادا کړي چې د دایمي استوګنې وړتیا ترلاسه کړي. همدارنګه هغه کسان چې د پناه غوښتنې غوښتنلیک یې رد شي او له هېواد څخه ووځي، باید دا لګښتونه بېرته ادا کړي، څو په راتلونکي کې د بیا داخلېدو اجازه ترلاسه کړي. د بریتانیا د کورنیو چارو وزیرې شبانه محمود ویلي چې دا بدلونونه ښيي چې «له پناه غوښتونکو ملاتړ یو حق دی، خو په عین حال کې یو مسؤلیت هم لري». هغې زیاته کړې: «کله چې کسان په ټولنه کې ونډه اخیستلای شي او د بریتانیا د خلکو سخاوت جبران کړي، موږ تمه لرو چې دا کار ترسره کړي».
