د کونړ ولایت د امنیې قوماندانۍ ویاند، فرید دهقان، وایي چې تېره شپه شاوخوا د شپې په ۱۲ بجو د پاکستان پوځي الوتکو د منورې ولسوالۍ د برولو په سیمه کې پر یوه ملکي کور هوايي برید کړی دی. د نوموړي په وینا، برید د سیمې د یوه اوسېدونکي، اسحاق، پر کور شوی، چې له امله یې یاد کور په بشپړ ډول نړېدلی دی. هغه زیاته کړې چې په دې برید کې د انساني مرګژوبلې راپور نه دی ورکړل شوی، خو نږدې ۳۰ څاروي پکې له منځه تللي دي. تر اوسه پاکستان د دغې پېښې په اړه څه نه دي ویلي.
