د امریکا د استازو جرګې جمهوريپالو مشرانو د پنجشنبې په ورځ په ناڅاپي ډول د هغې پرېکړهلیک د رایهاچونې بهیر لغوه کړ چې هدف یې د ایران په تړاو د ډونالډ ټرمپ د جګړهییزو واکونو محدودول وو؛ دا اقدام وروسته له هغه ترسره شو چې د یو شمېر جمهوريپالو استازو د نه حضور له امله د دې طرحې د احتمالي ماتې په اړه اندېښنې زیاتې شوې. دغه پرېکړهلیک د ګریګوري مېکس له خوا وړاندې شوی و، چې د نیویارک ایالت د ډیموکرات ګوند استازی او د استازو جرګې د بهرنیو اړیکو کمېټې لوړپوړی غړی دی. هغه تر دې مخکې ویلي وو چې مایک جانسن هڅه کوي د رایهاچونې بهیر وځنډوي. دا طرحه د «جګړهییزو واکونو قانون» پر بنسټ جوړه شوې وه؛ هغه قانون چې د ویتنام جګړې وروسته تصویب شو، څو د امریکا ولسمشران د کانګرس له تایید پرته پوځي شخړو ته د داخلېدو له واکه محدود کړي. د دې پرېکړهلیک له مخې، د ټرمپ اداره به مکلفه وه چې د ایران پر ضد د هر نوي پوځي اقدام تر مخه د کانګرس اجازه ترلاسه کړي. د کانګرس سرچینې وایي، د څو جمهوريپالو استازو نه حضور د رایهاچونې د احتمالي ناکامۍ په اړه اندېښنې زیاتې کړې وې؛ داسې موضوع چې د ډونالډ ټرمپ او د استازو جرګې د جمهوريپالو مشرتابه لپاره سیاسي ضربه ګڼل کېدای شوه. په پای کې، د ګوند مشرانو پرېکړه وکړه چې د رسمي پیل تر مخه رایهاچونه لغوه کړي. دا تحول په داسې حال کې رامنځته شوی چې د ایران پر وړاندې د چلند او د ولسمشر د پوځي واکونو په اړه د جمهوريپال ګوند دننه اختلافات لا څرګند شوي دي.
