د ماشومانو د ژغورنې نړیوالې ادارې یا Save the Children په یوه راپور کې ویلي چې په یمن کې د اوربند له نافذېدو سره سره نږدې ۱۲۰۰ ماشومانو ته مرګ ژوبله اوښتې ده. د راپور له مخې، د ۲۰۲۲ م کال د اپرېل له ۲مې نېټې راهیسې، چې د ملګرو ملتونو په منځګړتوب اوربند نافذ شو، لږ تر لږه ۳۳۹ ماشومان وژل شوي او ۸۴۳ نور ټپیان شوي دي. راپور زیاتوي چې نږدې نیمايي دغه پېښې د ماینونو او د جګړې د پاتې چاودېدونکو توکو له امله رامنځته شوې دي او ماشومان د لویانو په پرتله څو چنده ډېر زیانمن دي. یادې ادارې خبرداری ورکړی، سره له دې چې عمومي تاوتریخوالی کم شوی، خو لا هم د جګړې اغېزې د ماشومانو پر ژوند جدي سیوری اچولی او هغوی یې له دوامداره خطرونو سره مخ کړي.
