د امریکا ۵۰ ایالتونو کې لاریون کوونکي تېره ورځ سړکونو ته راووتل ترڅو د امریکا د ولسمشر ډونالډ ټرمپ د پالیسیو پر ضد اعتراض وکړي. د سپینې ماڼۍ ویاندې لاریونونه بې ګټې او د ټرمپ په وړاندې د دښمنۍ له امله هڅول شوي وبلل. د دغه لاریونونو تنظیموونکو ویلي، چې لاریونونه د زیاتېدونکي انفلاسیون، د کډوالۍ پالیسیو، له ایران سره د جګړې او نورو مسئلو پر ضد اعتراض لپاره ترسره شوي دي. دوی زیاته کړه: “ټرمپ غواړي پر موږ د یو دیکتاتور په څېر حکومت وکړي، خو دا امریکا ده، او واک د خلکو دی، نه د هغو کسانو چې غواړي پر ځان یا د دوی د میلیاردر ملګرو پر ضد حکومت وکړي.” له دې سره رویټرز راپور ورکړی، د امریکا په ټولو ۵۰ ایالتونو کې څه باندې ۳۲۰۰ لاریونونه پلان شوي او لاریون کوونکي هیله لري، چې سږکال یو بل تاریخي ډلهییز لاریون ترسره کړي. تمه کېده، چې لوی لاریونونه په مینیسوټا، نیویارک، لاس انجلس، واشنګټن او ورجینیا کې ترسره شي. اصلي تمرکز د لویو ښارونو او کوچنیو سیمو په هغو څنډو کې دی، چې په تېرو ټاکنو کې یې ټرمپ ته رایه ورکړې وه. له دې سره د سپینې ماڼۍ ویاندې ابیګیل جیکسن لاریونونه بې ګټې او د ټرمپ په وړاندې د دښمنۍ له امله هڅول شوي وبلل، نوموړې خپلو خبرو کې ويلي، چې دا پېښې یوازې د خبریالانو لپاره مهمې وې. باید وویل شي، چې د تېر کال “پاچا ته نه” لاریونونه د ټرمپ د زېږون په ورځ، د جون په ۱۴مه پیل شول او په ټول هېواد کې میلیونونو خلکو په کې ګډون وکړ.
