د هندي کشمیر خلکو له ایران سره د پیوستون لپاره اقدام کړی او په ایران کې د جګړې له امله اغېزمنو شویو خلکو لپاره د لویې کچې کمپاین په پیل کولو سره مالي مرستې راټولوي. د دغه کمپاین د زرګونو ویډیوګانو د پراخې خپرېدو ځانګړې برخه دا ده، چې ښځو او نجونو خپلې غوږوالۍ، بنګړي، ګوتې او د سرو زرو ټوټې د ایران خلکو ته ورکړې دي. د عصر ایران ویبپاڼې په وینا، د ایران له خلکو سره د پیوستون لپاره په هندي کشمیر کې یو لوی ملي کمپاین پیل شوی او زرګونه کشمیریان د ایران له خلکو سره د مرستې لپاره هر هغه څه بسپنه کوي چې دوی یې کولی شي. د کشمیر مسلمانو خلکو، په ځانګړې توګه په بډګام او بارامولا سیمو کې، په ایران کې د اغېزمنو خلکو د ملاتړ لپاره یو بشري کمپاین پیل کړی دی. د کوچني اختر له لمانځلو وروسته، رضاکارانو، په ځانګړې توګه په شیعه میشتو سیمو او حتی په زیاتره سني سیمو کې، د ایران په وروستیو پوځي بریدونو کې د اغېزمنو شویو خلکو لپاره د مالي مرستې راټولولو لپاره کور په کور د بسپنې راټولول تنظیم کړل. خلکو نه یوازې پیسې، بلکې د سرو زرو او سپینو زرو ګاڼې، څاروي او دودیز مسو توکي هم ورکړل. په ټولنیزو رسنیو کې یوه ویډیو خپره شوې او پکې ښکاري چې یوې کشمیري کونډې د سرو زرو یوه یادګاري ډالۍ ورکړه چې هغې د خپل مړ خاوند په یاد کې د ۲۸ کلونو لپاره ساتلې وه. له دې سره داسې هم ویل شوي چې د کشمیر د بډګام څخه د هند د پارلمان غړي منتظ مهدي خپل د یوې میاشتې معاش کمپاین ته ورکړ. تمه کیږي چې د دې ټول هیواد کمپاین له لارې به زیاته اندازه مالي مرسته راټوله شي او د رسمي مرستندویه ادارو له لارې به په هند کې د ایران سفارت حساب ته ولېږدول شي ترڅو ډاډ ترلاسه شي چې دا مرستې اړمنو خلکو ته رسیږي. باید وویل شي چې په هند کې د ایران سفارت په خپل ټویټر حساب کې عکسونه او ویډیوګانې شریکې کړې، د کشمیر خلکو څخه د دوی د سخاوتمندانه مرستو لپاره مننه وکړه. په بیان کې ویل شوي: “د مننې ډک زړه سره، موږ د کشمیر له مهربانو خلکو څخه په کلکه مننه کوو چې د دوی د بشري ملاتړ او زړه سوانده پیوستون له لارې د ایران خلکو سره ولاړ دي. دا مهربانۍ به هېڅکله هېره نشي. مننه، هند.”
