د راپورونو له مخې، پرون ورځ په غزه کې د اسرائیلو په بریدونو کې لږ تر لږه ۶۵ فلسطینیانو ژوند له لاسه ورکړی دی. الجزیرې د فلسطین د روغتيايي چارواکو له قوله راپور ورکړی، له دې ډلې ۴۹ تنو د غزې په ښار او د مرکزي غزې په الوادي سیمه کې پر هغو ودانیو او ښوونځیو ترسره شويو بریدونو کې ژوند له لاسه ورکړی، چې د ملګرو ملتونو له لوري پر پناهځایونو بدل شوي دي. سرچینه زیاتوي، له یادو کسانو اووه یې د مرستو ترلاسه کولو پر مهال وژل شوي دي. الجزیره لیکي، د اسرائیلو د بریدونو له پیله راهیسې په غزه کې څه باندې ۶۴۸۰۰ فلسطینیانو ژوند له لاسه ورکړی او تر ۱۶۴۲۶۰ ډېر نور ټپيان شوي دي.
