د ټرمپ ادارې د نړیوالې جنایي محکمې په څلورو چارواکو باندې د امریکا متحده ایالاتو او اسراییلو د قضیو د حل کولو لپاره یو ځل بیا بندیزونه لګولي دي. د امریکا د بهرنیو چارو وزارت او د خزانې وزارت د چهارشنبې په ورځ، د زمري ۲۹مه اعلان وکړ چې دوی د نړیوالې جنایي محکمې په دوو قاضیانو او دوو څارنوالانو نوي بندیزونه لګولي دي. په دې پرېکړه کې شامل کسان د فرانسې نیکولاس یانګوي، د فیجي نزهت شمیم خان، د سنګال مامي میندي نیانګ او د کاناډا کیمبرلي پروسټ دي. واشنګټن چارواکي د متحده ایالاتو او اسراییلو په قضیو کې د ښکیلتیا په تور تورن کړي دي. د امریکا د بهرنیو چارو وزیر مارکو روبیو قضایي اداره “ملي امنیت ته ګواښ” او “د قانوني جګړې وسیله” وبلله. په مقابل لوري کې پاریس د بندیزونو سمدستي لرې کولو غوښتنه وکړه، د فرانسې د بهرنیو چارو وزارت په یوه بیان کې ټینګار وکړ چې “د معافیت په وړاندې مبارزه کې د دې چارواکو رول بنسټیز اهمیت لري.” ملګرو ملتونو هم د واشنګټن پریکړه “د نړیوال عدالت لپاره یو جدي خنډ” وبلله. د عمومي منشي ویاند، استیفان دوجاریک، خبرداری ورکړ چې بندیزونه د محکمې خپلواکي کمزورې کوي. له دې سره د اسراییلو د لومړي وزیر دفتر د متحده ایالاتو د دې اقدام هرکلی وکړ، او دا یې “د ملي حاکمیت ملاتړ” وباله. دا بندیزونه د ټرمپ ادارې لخوا په محکمه کې د څلورو نورو قاضیانو په نښه کولو څخه درې میاشتې لږ وروسته راځي.
