د کابل یو شمېر اوسېدونکي،چې په کرایي کورونو کې اوسېږي، د کرایې له لوړېدو شکایت کوي.
دوی وايي چې په وروستیو میاشتو کې د کورونو کرایې په بې ساري ډول لوړې شوې او طالبانو ورته هېڅ پاملرنه نه ده کړې.
دوی له طالبانو غواړي، چې د خلکو اقتصادي ستونزې ته په کتو د کورونو نرخ وټاکي،ځکه د کډوالو او داخلي راستنېدونکو له پراخ حضور سره هممهاله، د خلکو لپاره د کرایي کور موندل خورا ستونزمن شوي دي.
په دې وروستيو کې يو شمېر کابل مېشتي د لوړو کرایو له امله اړ دي،چې له مرکزه لېرې سیمو ته یا هغو کورونو ته کډه شي،چې لږې اسانتیاوې لري.
دوی زياتوي،چې په ځینو مواردو کې د کرایې ورکولو لپاره د خپل ژوند اړین توکي پلوري.
د کاري فرصتونو له نشتوالي، په هېواد کې د بې وزلۍ او لوږې له ډېرېدو او د بهرنیو مرستو له کمېدو سره هممهاله، د هېوادولو پر وړاندې ننګونې خورا زیاتې شوې دي.
ډېری خلک وايي،چې دوی ان د یو وخت خوړو د برابرولو توان له لاسه ورکړی او په دې حالت کې، د کرایې زیاتوالي د دوی ستونزې نورې هم ژورې کړې دي.
دا په داسې حال کې ده،چې د ملګرو ملتونو د کډوالو عالي کمیشنرۍ په دې وروستیو کې اعلان وکړ چې د روان کال په اپریل کې له ایران او پاکستانه څه باندې ۲۸۰زره کډوال په زور یا په خپله خوښه هېواد ته راستانه شوي دي.
د کډوالو راستنېدل او ښاري سیمو ته د هغوی پراخ راتګ په کابل کې د کورونو پر بازار ژور اغېز کړی دی.
