د سعودي عربستان د انرژۍ وزیر د اتریش په پلازمېنه ویانا کې د نړیوالې اټومي انرژۍ ادارې په یوه عمومي غونډه کې اعلان وکړ، چې په مدینې سیمه کې ۱۱۰ میلیون ټنه یورانیم لرونکي منرالونه کشف کړي دي.د سعودي دولتي ټلوېزیون راپور ورکړی چې د سعودي د انرژۍ وزیر عبدالعزیز بن سلمان په ویانا کې د نړیوالې اټومي انرژۍ ادارې په ۷۰مه عمومي غونډه کې وویل چې په مدینه کې د جبل سعید په پروژه کې اکتشاف او جیولوژیکي سروې د نادره ځمکو عناصرو، په ځانګړې توګه درنو عناصرو، او د یورانیمو لویه زېرمه یې موندلې ده.هغه وویل: “د جبل سعید په پروژه کې اکتشاف او جیولوژیکي مطالعاتو د شاوخوا ۱۱۰ میلیون ټنو کانونو شتون ښودلی چې د نادره ځمکو عناصرو، په ځانګړې توګه درنو عناصرو، او د یورانیمو د امید وړ غلظت سره لوړ غلظت لري.”دوی زیاتوي چې د ۱۱۰ میلیون ټنو شمېر د کانونو ټول پېژندل شوي مقدار ته اشاره کوي او په دې معنی ندي چې سعودي عربستان ۱۱۰ میلیون ټنه یورانیم کشف کړي دي.باید وویل شي چې د دې کشف اعلان په داسې حال کې کیږي چې ریاض خپل ملکي اټومي پروګرام پراخوي او د امریکا سره یې د اټومي او کانونو همکاري هم زیاته کړې ده.سعودي عربستان په وروستیو کلونو کې د کانونو او نادره ځمکو په سکتورونو کې پانګونه زیاته کړې او هڅه کوي چې د خپلو اقتصادي سرچینو د تنوع کولو لپاره د یوې برنامې برخې په توګه د تیلو عایداتو باندې خپل انحصار کم کړي.د سعودي رسمي مطبوعاتي ادارې مخکې راپور ورکړی و چې د هیواد د پیژندل شوي نادره ځمکو زیرمو ارزښت د ۱۴۰۴ کال د نومبر تر میاشتې پورې شاوخوا ۱۰۰ میلیارد ډالرو ته رسېدلی، چې دا شمېره د ۲۰۱۸ کال په پرتله شاوخوا ۹۰ سلنه زیاتوالی ښیي.