د کالیفورنیا د ۱۴مې ټاکنیزې سیمې لپاره د امریکا د استازو جرګې غړې عایشه وهاب وايي، د کالیفورنیا د والي ګېوېن نیوسم ملاتړ یې ترلاسه کړی دی.
وهاب ویلي، له نیوسم سره یې د عامه خوندیتوب، د ځنګلي اورونو له امله د رامنځته شوو ستونزو د هواري، د کورونو د بیو د راکمولو او د کارکوونکو، مشرانو او کورنیو د حقونو د خوندي کولو په برخو کې ګډ کار کړی دی.
هغې د نیوسم له ملاتړ څخه مننه کړې او ویلي یې دي چې په کانګرس کې به د کالیفورنیا د ۱۴مې ټاکنیزې سیمې د خلکو لپاره خپلو هڅو ته دوام ورکړي.
وهاب د ۲۰۲۶ کال په ځانګړو ټاکنو کې د کالیفورنیا د ۱۴مې ټاکنیزې سیمې څوکۍ وګټله او د امریکا د کانګرس لومړنۍ افغانالاصل غړې شوه. د نومبر په عمومي ټاکنو کې به نوموړې د بشپړې دوه کلنې دورې لپاره بیا سیالي وکړي.
