د خبریالانو د خوندیتوب کمېټې(CPJ) خبر ورکړی، چې په ۲۰۲۵م کال کې د نړۍ په بېلابېلو هېوادونو کې لږترلږه ۱۲۹ خبریالان او رسنیز فعالان وژل شوي دي. د فرانسې خبري اژانس د فبرورۍ په ۲۵مه، راپور ورکړی، چې اسراییل د نړۍ د خبریالانو د نږدې دوه پر درېیمه برخه د وژنې مسئول بلل شوی دی. د راپور له مخې، تر ۶۰سلنې ډېر وژل شوي خبریالان فلسطینیان وو چې د غزې تړانګې اړوند پېښو ته یې پوښښ ورکاوه. د اسراییلو پوځ دا ادعا رد کړې او ویلي یې دي چې خبریالان په قصدي ډول نهدي په نښه شوي. د کمېټې راپور ښيي، چې له درې پر څلورو څخه زیاتې مرګژوبلې د وسلهوالو شخړو پرمهال رامنځته شوې دي. همداراز، د خبریالانو پر وړاندې د بېپیلوټه الوتکو (ډرون) بریدونه په بېساري ډول زیات شوي دي. د راپور له مخې، د ثبت شويو ۳۹ ډرون بریدونو څخه ۲۸ یې په غزه کې اسراییلو ته منسوب شوي او پنځه نور بریدونه د سوډان د چټکو ملاتړ ځواکونو پورې تړل شوي دي. په اوکراین کې هم څلور خبریالان د روسیې د پوځي ډرون بریدونو له امله وژل شوي دي. دا له ۲۰۲۲م کال وروسته تر ټولو لوړه کلنۍ شمېره ده، هغه کال چې ۱۵ خبریالان وژل شوي وو. یادې کمېټې خبرداری ورکړی، چې د رڼو څېړنو نشتوالی او د معافیت فرهنګ د دې لامل شوی، چې خبریالان لا زیات له خطر سره مخ شي. د کمېټې اجرائيوي مشره، جودي ګینزبرګ، ویلي: «کله چې خبریالان د خپل مسلکي کار له امله وژل کېږي، نو دا یوازې پر هغوی برید نه دی، بلکې پر ټولنه او د معلوماتو پر ازاد بهیر هم ګواښ دی.» سربېره پر دې، په مکسیکو، فلیپین، هند، بنګلهدېش او پیرو کې هم د هغو خبریالانو د وژل کېدو پېښې ثبت شوې، چې د فساد او تنظیم شوې جرمونو په اړه یې راپورونه ورکول.
