د ملګرو ملتونو د وروستیو معلوماتو له مخې، په نړۍ کې میلیونونه ماشومان لا هم د جګړو له ناوړه اغېزو سره مخ دي. دغه سازمان ټینګار کوي، چې ماشومان باید په خوندي چاپېریال کې ژوند وکړي او زدهکړو ته لاسرسی ولري، نه دا چې د جګړو په لیکو کې د سرتېرو په توګه وکارول شي. د ۲۰۲۴ م کال لپاره د ملګرو ملتونو راټول او تایید شوي معلومات ښيي چې د ماشومانو پر وړاندې لسګونه زره جدي سرغړونې ثبت شوې دي. په دغو کې د ماشومانو د سرتېرو په توګه کارول، وژل او ټپي کېدل، جنسي تاوتریخوالی، تښتونه، پر ښوونځیو او روغتونونو بریدونه او بشري مرستو ته د لاسرسي مخنیوی شامل دي. دغه سازمان وایي زرګونه ماشومان په مستقیم ډول د جګړو له دغو پېښو اغېزمن شوي، خپل ژوند یې له لاسه ورکړی یا ټپیان شوي دي. ملګري ملتونه ټینګار کوي، چې د ماشومانو حقونه د ماشومانو د حقونو کنوانسیون له مخې خوندي شوي، هغه نړیوال تړون چې د ماشومانو بنسټیز حقونه او اړتیاوې تعریفوي. سره له دې، لا هم ماشومان د جګړو تر ټولو زیانمنه ډله پاتې ده. ملګري ملتونه زیاتوي، چې ځینو هېوادونو د ماشومانو د حقونو د ساتنې لپاره خپل تعهدونه تازه کړي او عملي ګامونه یې پورته کړي، خو لا هم پراخو هڅو ته اړتیا ده. دغه سازمان همدارنګه د سولې د ترویج لپاره یو نړیوال نوښت هم پیل کړی، چې په کې ماشومان د کاغذ نه جوړي شوي کوترو له لارې د سولې پیغامونه شریکوي، ترڅو نړۍ ته دا وښيي، چې ماشومان جګړه نه، بلکې سوله غواړي. په پای کې، ملګري ملتونه ټینګار کوي، چې د ماشومانو ساتنه یو نړیوال مسئولیت دی او که جدي اقدامات ونه شي، نو لا ډېر ماشومان به د جګړو قرباني شي.
