د نړیوالو رسنیو د راپورونو له مخې، متحده ایالات په تېرو ورځو کې له ۲۵۰ څخه زیاتې بار وړونکې الوتنې ترسره کړې، چې له لارې یې خپل پوځي تجهیزات، وسلې او لوژستیکي امکانات د منځني ختیځ بېلابېلو اډو ته لېږدولي دي. ویل کېږي چې دغه تجهیزات د اردن، بحرین او سعودي عربستان په پوځي اډو کې ځای پر ځای شوي دي. د سي اېن اېن راپورونه څرګندوي، چې په لېږدول شویو تجهیزاتو کې پرمختللي دفاعي سیستمونه، مهمات، زغرهوال وسایط او نور تخنیکي امکانات شامل دي، څو په سیمه کې د هر ډول احتمالي امنیتي وضعیت لپاره چټک غبرګون ممکن شي. ځینې شنونکي دا اقدام د سیمهییزو امنیتي اندېښنو او د وروستیو جیوپولیټیکي بدلونونو په رڼا کې د احتیاطي چمتووالي برخه بولي. دغه پوځي تحرکات په داسې حال کې زیات شوي چې ټاکل شوې ده د سېشنبې په ورځ په جنیوا کې د ایران او امریکا ترمنځ د اټومي پروګرام په اړه مهمې خبرې ترسره شي. ویل کېږي چې دواړه لوري هڅه کوي د ډیپلوماټیکو لارو د شخړو د حل لپاره زمینه برابره کړي، خو له بلې خوا واشنګټن د احتمالي ناکامۍ یا کړکېچ د زیاتېدو په صورت کې خپل پوځي حضور پیاوړی کړی دی. کارپوهان باور لري، چې دا ډول هممهاله ډیپلوماټیک او پوځي اقدامات د فشار او امتیاز د سیاست برخه کېدای شي، څو مقابل لوری د خبرو مېز ته د لا زیات امتیاز ورکولو ته وهڅول شي. په عین وخت کې ځینې سیمهییز هېوادونه هم وضعیت له نږدې څاري، ځکه هر ډول احتمالي کړکېچ کولای شي د انرژۍ بازارونه، سوداګري او عمومي سیمهییز ثبات اغېزمن کړي. تر اوسه د متحده ایالات او ایران چارواکو د دغو پوځي لېږدونو په اړه رسمي جزئیات نه دي خپاره کړي، خو د نړیوالو څارونکو په باور، سیمه د حساسو سیاسي تحولاتو له پړاو څخه تېرېږي او راتلونکې خبرې به د راتلونکو میاشتو لپاره د امنیتي وضعیت پر لوري مهم اغېز ولري.
