د لبنان ځينو رسنیو راپور ورکړی، چې د یاد هېواد په ختیځ کې، د سوریې پولې ته نږدې د اسرائیلو د هوايي برید پر مهال څلور تنه وژل شوي دي. بل لور ته اسراییلي چارواکو ویلي، چې په دغه برید کې یې د جهاد اسلامي فلسطین غړي په نښه کړي. دا له اوربند وروسته لومړی ځل دی، چې اسرائیل په رسمي ډول اعلان کوي، چې جهاد اسلامي یې په لبنان کې هدف ګرځولی دی. د لبنان د ملي خبري اژانس پر وینا؛ د اسرائیلو یوې دښمنې بېپیلوټه الوتکې د لبنان او سوریې پولې ته نږدې یو موټر په نښه کړی، چې د څلورو وژل شویو کسانو جسدونه لاهم د موټر دننه پاتې دي.
