جرمني پرون چهارشنبې ۴۷ افغان وګړي له اسلاماباد څخه برلین ته انتقال کړل. دغه کسان له میاشتو راهیسې په پاکستان کې جرمني ته د لېږد په تمه وو. د جرمني د کورنیو چارو وزارت ویلي، چې دا افغانان د «فدرالي منلو پروګرام» په چوکاټ کې، د قانوني پړاوونو له بشپړېدو او د ویزو له ترلاسه کولو وروسته، دغه هېواد ته داخل شوي دي. د لېږد بهیر او قانوني پرېکړې په وروستیو میاشتو کې یو شمېر په شرایطو برابر کسان د ځانګړو او یا عادي الوتنو په وسیله جرمني ته رسېدلي دي. د دغو لېږدونو یوه برخه د جرمني د محکمو د پرېکړو له مخې عملي شوې ده. اوس مهال په اسلاماباد کې ډېرې افغان کورنۍ، چې د جرمني د منلو ژمنه ورسره شوې، په نامعلوم حالت کې ژوند کوي او له میاشتو، آن کلونو راهیسې د خپلو دوسیو د وروستۍ پرېکړې په تمه دي. د جرمني حکومت ژمنه کړې وه، چې ټول په شرایطو برابر افغانان به ژر تر ژره له پاکستان څخه انتقال کړي، خو د دې بهیر ځنډ لا هم دوام لري. دا په داسې حال کې ده، چې د پاکستان حکومت یو شمېر افغانان بېرته اخراج کړي او هغوی چې یې اېستلي نه دي، تر سخت فشار لاندې دي.
