وروسته له هغه چې د امریکا د کډوالو او ګمرکونو د تطبیق مامورینو یوه ۳۷ کلنه ښځه په ډزو ووژله، په زرګونو امریکایان سړکونو ته راووتل او په ټول هېواد کې یې لاریونونه وکړل. دا ډزې درې ورځې وړاندې رامنځته شوې، او د خلکو غوسه یې راپارولې ده، لاریونونه له مینیاپولیس څخه لسګونو نورو ایالتونو ته هم خپاره شوي دي. لاریون کوونکو د فدرالي تاوتریخوالي پر وړاندې شعارونه ورکړي او له کډوالو سره یې د تاوتریخوالي د پای ته رسولو غوښتنه یې کړې ده. د راپورونو له مخې، د ایالت چارواکو له خلکو غوښتي چې لاریونونه په سولهییزه توګه ترسره کړي، خو د شپې د لاریونونو په جریان کې لسګونه کسان نیول شوي دي. یوه لاریون کوونکي رسنیو ته ویلي: “د کډوالۍ او ګمرکونو د تطبیق ادارې داسې چاپېریال رامنځته کړی چې هیڅوک په کې خوندي احساس نه کوي. موږ په وېره کې ژوند کوو، او دا د منلو وړ نه ده.” لومړني راپورونه ښيي چې د ICE اجنټانو په ځان دفاع کې ډزې کړې، خو د قرباني کورنۍ او د مدني حقونو فعالانو دا ادعا رد کړې او د بې طرفه څېړنې او قانوني حساب ورکولو غوښتنه یې کړې ده. دې پښې یو ځل بیا د کډوالۍ ادارې د کار، د امریکا د کډوالو پالیسیو او د اتباعو، په ځانګړې توګه د کډوالو د حقونو په اړه تاوده بحثونه راپورته کړي دي.
