په خوست کې بیا یو ځوان ځان‌وژنه کړې

په خوست کې ځايي سرچینې خبر ورکړی، چې یو ځوان د اقتصادي ستونزو له امله ځان وژلی دی. سرچینو ویلي چې دا ځوان زینت‌الله نومېده او د لکڼو سیمې د «ماما شهید» کلي اوسېدونکی و. د سرچینو پر وینا، دا پېښه تېره جمعه د سهار شاوخوا ۹:۰۰ بجې رامنځته شوې او نوموړي ځوان په ډزو ځان ویشتی دی. د زینت‌الله نږدې خپلوانو هم منلې چې هغه له بېکارۍ او اقتصادي ستونزو کړېده. د یادونې ده چې په دې وروستیو اوونیو کې نه يوازې خوست، بلکې د هېواد په بېلابېلو ولايتونو کې د وژنې پېښې ډ‌ېرې شوې دي.