په پاکستان کې د پولیو واکسین د کمپاین له پيلېدو سره سم، سیمهییزو سرچینو راپور ورکړی،چې د خیبر پښتونخوا ایالت په ټانک سیمه کې دوه روغتیايي کارکوونکي د نامعلومو وسلهوالو لخوا تښتول شوي دي.
د پاکستاني رسنیو د راپورونو له مخې، دا پېښه پرون دوشنبې د ډېره اسماعیلخان ښار په ټانک سیمه کې رامنځته شوې.
ډېره اسماعیلخان کې د پولیو واکسین پنځه ورځنی کمپاین پیل شوی و. دوه روغتیايي کارکوونکي چې د خپلو دندو په ترسره کولو بوخت وو، د نامعلومو وسلهوالو کسانو لخوا د خپل ماموریت ځای ته د تګ پرمهال ودرول شول او نامعلوم ځای ته یووړل شول.
ځايي پولیسو د دې پېښې پخلی کړی او د دغو کسانو د موندلو لپاره یې د پلټنې عملیات پیل کړي، خو تر اوسه کومې ډلې د تښتونې مسئولیت نه دی منلی. روغتیايي سرچینو دا هم ویلي چې دې پېښې د واکسیناسیون ټیمونو د امنیت په اړه جدي اندېښنې راپورته کړي او ممکن د کمپاین پلي کولو پروسه ګډوډه کړي.
په پاکستان کې د واکسین کمپاینونه تل له امنیتي ننګونو سره مل وي.
په وروستیو کلونو کې، لسګونه روغتیايي کارکوونکي او امنیتي افسران د پولیو واکسین ورکولو پرمهال د وسلهوالو بریدونو هدف ګرځېدلي دي. په دې هېواد کې ځینې افراطي ډلې واکسین ته په منفي او دسیسه ولاړ نظر ګوري، کوم چې په سیمه کې د پولیو ویروس د بشپړ له منځه وړلو په لاره کې یو لوی خنډ دی.
د داسې ګواښونو دوام نه یوازې د روغتیایي کارکوونکو ژوند له ګواښ سره مخ کوي، بلکې د هغو ماشومانو نسلونو راتلونکی هم ګواښوي چې د پولیو فلج کوونکي ویروس سره مخ دي.
