نړیوالو رسنیو راپور ورکړی، چې په اندونیزیا کې د مهماتو په یوه زېرمه کې د یوې مرګونې چاودنې له امله د څلورو پوځیانو په ګډون لږترلږه ۱۳ کسان وژل شوي دي.
اسوشیټیډ پریس راپور ورکړی،چې دا پېښه پرون دوشنبې هغه وخت رامنځته شوه،چې پوځي ځواکونه په لوېدیځ «جاوا» کې د تاریخ تېر مهمات پاکول.
رسنیو همدا راپور ورکړی،چې د اندونیزیا د پوځ ویاند کریسټومي سیانټوري په حواله، نهه ملکي وګړي او څلور سرتېري د قربانیانو په منځ کې شامل دي.
د پوځ یو بل ویاند، واهیو یودهایانا، سیمهییز ټلوېزیون ته ویلي،چې چاودنه د مهماتو د تصفیې پروسې په پای کې وشوه او پوځ یې د دقیق لامل په اړه پلټنه کوي.
دا په تېر کال کې په اندونیزیا کې د زړو مهماتو دوهمه پېښه ده. رسنیو د تېر کال په مارچ کې د جاکارتا ته نږدې په یوه ډیپو کې د ورته اورلګېدنې یادونه کړې ده.
چاودنې او د زړو مهماتو سره تړلو پېښو په اندونیزیا کې د مهماتو د تصفیې پروسو د خوندیتوب په اړه اندېښنې راپورته کړې دي. پوځي چارواکو ژمنه کړې،چې د داسې پېښو د بیا پېښېدو مخنیوي لپاره به بشپړه څېړنه وکړي.
