د ملګرو ملتونو د ماشومانو د ملاتړ صندوق (یونیسف) ويلي،چې په افغانستان کې د نو زېږو ماشومانو د ملاتړ لپاره له ۶۶۰۰۰ کورنیو سره نغدي مرسته کوي.
یونیسف نن دوشنبې په یوه راپور کې ویلي،چې دا پروژه به له زېږونه تر ۱۸ میاشتو پورې د ماشومانو ملاتړ وکړي.
د راپور له مخې، دا ۶۶۰۰۰ پر شرایطو برابرې کورنۍ به د زابل، کونړ، سمنګان او غور ولایتونو کې له دغو مرستو برخمنې شي.
د یونیسف په راپور کې راغلي چې په دغو ولایتونو کې د خوارځواکۍ کچه د نورو ولایتونو پرتله له معمولې کچې لوړه ارزول شوې ده.
یونیسف دا پروژه د مرکزي آسیا د بانک او نورو شریکانو په مالي ملاتړ تمویلوي.
دا پیسې به د ماشومانو د خوړو او درملنې لپاره وکارول شي.
په افغانستان کې د خوارځواکۍ ناورین لا هم مخ په زیاتېدو دی او ملګرو ملتونو خبرداری ورکړی،چې سږکال به پر دې ناروغۍ د اخته ماشومانو شمېر ۳.۵ میلیونو ته لوړ شي.
